Сизларни Рамазон ҳайити билан “Ўзпахтасаноатэкспорт” холдинг компания жамоаси ва шахсан ўз номимдан самимий муборакбод этаман.
Рамазон ҳайити ҳамиша халқимиз маънавий ҳаётида тарбиявий жиҳатлари билан алоҳида ўрин тутган. Бу кунлар моҳиятида яхшилик, сабр-қаноат, меҳр-оқибат каби фазилатлар, эзгу миллий қадриятларимиз ўз ифодасини топган.
Рамазон ҳайити муносабати билан муқаддас динимиз ақидаларини эъзозлаш, буюк алломалар, азиз-авлиёларимизнинг қадамжоларини обод этиш борасида кенг кўламли ишлар амалга оширилмоқда.
Бу кунда беморлар ва кексалар ҳолидан хабар олинади, кўмакка муҳтож кишилар қўллаб-қувватланади, болаларга ҳадялар, ширинликлар улашилади.
Миллий-диний қадриятларимизни улуғлаш йўлида амалга оширилаётган изчил ислоҳотлар мамлакатимизда ҳукм сураётган тинчлик, осойишталик, миллатлараро тотувлик ва фаровонлик самарасидир. Бу Рамазон ҳайитини миллий қадриятларимизга мос тарзда нишонлаш бўйича амалга оширилаётган ишларда ҳам ўзининг ёрқин ифодасини топмоқда.
Рамазон ҳайити байрамингиз билан яна бир бор табриклар эканман, тизимда фаолият олиб бораётган сиз азиз ҳамкасбларга, соҳа ривожига катта ҳисса қўшган меҳнат фахрийлари—Устозларга мустаҳкам соғлик, узоқ ва мазмунли умр, келгуси ишларингизда катта муваффақиятлар, файзли хонадонларингизга тинчлик-хотиржамлик, бахт-саодат ва қут-барака тилайман!
Рамазон ҳайити байрамини хотиржамликда, хурсандчиликда ўтказиш ҳаммамизга насиб этсин. Юртимиз ҳамиша тинч, халқимиз бундан-да фаровон, осмонимиз доимо мусаффо бўлсин!
Ҳурмат билан,
“Ўзпахтасаноатэкспорт” ХК бошқарув раиси А.Камалов
Publication author
